उत्तर प्रदेशको झाँसीस्थित महारानी लक्ष्मीबाई मेडिकल कलेजमा शुक्रबार राति भीषण आगलागी हुँदा १० नवजात शिशुको ज्यान गएको छ। झाँसी जिल्ला मजिस्ट्रेटले शिशुहरूको मृत्युको पुष्टि गरेका छन्।

आगलागी मेडिकल कलेजको नियोनेटल इन्टेन्सिभ केयर युनिट (एनआइसीयू) मा भएको हो। भारतीय सञ्चारमाध्यमहरूका अनुसार केही शिशुहरूको जलेर र केहीको निसास्सिएर मृत्यु भएको बताइएको छ।

यस घटनाप्रति उत्तर प्रदेशका उपमुख्यमन्त्री केशवप्रसाद मौर्यले दुख व्यक्त गर्दै आफ्नो आधिकारिक ट्विटमार्फत घाइते शिशुहरूको शीघ्र स्वास्थ्यलाभको कामना गरेका छन्।

घटनाको कारण र थप क्षतिको विवरणबारे अनुसन्धान जारी छ। मेडिकल कलेज प्रशासनले आगलागीको यकिन कारण खुलाएको छैन। घटनाले स्थानीय प्रशासन र आम नागरिकलाई स्तब्ध बनाएको छ।