जाजरकोट — स्थानीय सरकारका निरन्तर बेवास्ताबीच जाजरकोट जिल्लाको नलगाड नगरपालिका–११ मा जनताको सहयोग र जनश्रमदानमार्फत डेढ किलोमिटर सडक निर्माण भएको छ।

वडा अध्यक्ष लालबहादुर बानियाँको नेतृत्वमा चट्टान चिर्दै कठिन भौगोलिक क्षेत्र पार गर्दै सडक निर्माण कार्य सम्पन्न गरिएको हो। अध्यक्ष बानियाँ भन्छन्, “स्थानीय सरकारलाई पटक–पटक गुहार गर्दा पनि कुनै सुनुवाइ भएन। अन्ततः जनताको साथ लिएरै बाटो बनाउनुपर्‍यो।”

सडक नहुँदा समस्या
रजिगाछरिबाट पुनाको भिड हुँदै नलाक्चसम्म पुग्ने बाटो नभएकाले स्थानीय बासिन्दा वर्षौँदेखि आवतजावतमा समस्या झेल्दै आएका थिए। रोगी बोकेर हिँड्नुपर्ने, दैनिक उपभोग्य सामग्री ढुवानीमा कठिनाइ हुने जस्ता समस्याले गाउँलेलाई दिनहुँ पिरोलिरहेको थियो।

मन्त्रीकै पहल असफल
 यसअघि अध्यक्ष बानियाँले प्रदेश सरकारका आर्थिक मामिला तथा योजना मन्त्री राजिव शाहा सँग समस्या राखेका थिए। मन्त्रीले १ करोड रुपैयाँको बजेट प्रस्ताव गरे पनि अन्तिममा सो रकम समेटिन सकेन।

जनश्रमदान र ऋणमै सडक निर्माण
स्थानीयको जनश्रमदान र सहयोगमार्फत जम्मा ११ लाख रुपैयाँ बराबरको रकम संकलन भएको थियो। नगरपालिकाबाट भ्याट कटौतीपछि ३ लाख १० हजार रुपैयाँ उपलब्ध भयो। यसरी जम्मा करिब १६ लाख रुपैयाँ बराबरमा सडक निर्माण सम्पन्न भएको अध्यक्ष बानियाँले जानकारी दिए। उनका अनुसार अझै करिब २–३ लाख रुपैयाँ ऋण बाँकी छ।

सामाजिक सञ्जालमा चर्चित

सडक निर्माणमा जनताको सक्रिय सहभागिता र नेतृत्वको साहसिक कदमले अध्यक्ष बानियाँ अहिले सामाजिक सञ्जालमा चर्चाको पात्र बनेका छन्। स्थानीयले यसलाई “जनताको इच्छाशक्ति भए असम्भव केही हुँदैन” भन्ने उदाहरणका रूपमा लिएका छन्। उनि ७९ को स्थानीय चुनावमा स्वतन्त्र बाट निर्वाचित अध्यक्ष समेत हुन् ।