सुर्खेत। वीरेन्द्रनगर – ३, उत्तरगंगा, सुर्खेतस्थित साना किसान कृषि सहकारी संस्था लि। को २९ औं स्थापना दिवस विविध कार्यक्रमका साथ सम्पन्न भएको छ। संस्थाका अध्यक्ष चाँदनी ढकालको अध्यक्षतामा सम्पन्न उक्त कार्यक्रममा प्रमुख अतिथिका रूपमा साना किसान विकास लघुवित्त वित्तीय संस्था लि। शाखा कार्यालयका अधिकृत प्रभात चौधरी उपस्थित थिए। कार्यक्रममा संस्थाका उपाध्यक्ष बिन्द्रा थापा, सञ्चालक समिति सदस्यहरू, लेखा सुपरीवेक्षण समिति सदस्यहरू तथा अन्तर समूहका पदाधिकारीहरूको उपस्थिति रहेको थियो।

कार्यक्रमको प्रारम्भमा उपाध्यक्ष बिन्द्रा थापाले स्वागत मन्तव्य व्यक्त गरेकी थिइन् भने संस्थाका मुख्य प्रबन्धक चित्रप्रसाद रेग्मीले समिक्षागत प्रगति प्रस्तुत गर्दै संस्थाको वर्तमान अवस्था र भविष्यको रुपरेखाबारे जानकारी गराएका थिए।

प्रमुख अतिथि प्रभात चौधरीले आफ्नो मन्तव्य राख्दै साना किसान सहकारी संस्था साँचिकै किसानहरूको लागि समर्पित संस्था भएको उल्लेख गरे। उनले कर्णाली प्रदेशकै उत्कृष्ट संस्थाको रूपमा उत्तरगंगा सहकारी संस्थालाई उदाहरणीय रूपमा चित्रित गर्दै यसको वित्तीय अवस्था, सामाजिक उत्तरदायित्व तथा किसानहरूसँगको सम्बन्धलाई प्रशंसा गरे। साथै, संस्थाको निरन्तर प्रगतिको कामना गर्दै आगामी दिनहरूमा थप सशक्त रूपमा अघि बढ्ने विश्वास व्यक्त गरे।

स्थापना दिवसको अवसरमा विभिन्न प्रतियोगितात्मक कार्यक्रमहरू आयोजना गरीएको हो।सो कार्यक्रममा अन्तरसमूह स्तरीय हाजिरजवाफ प्रतियोगिता, म्युजिकल चियर, बेलुन फुटाउने प्रतियोगिता, घैँटो फुटाउने प्रतियोगिता जस्ता खेलकुद तथा मनोरञ्जनात्मक गतिविधिहरू प्रतिस्पर्धात्मक रूपमा सम्पन्न भए। साथै, वृद्ध सदस्यहरूलाई सम्मान, आर्थिक रूपमा कमजोर सदस्यलाई स्वास्थ्य उपचारका लागि आर्थिक सहयोग, उत्कृष्ट बाल बचतकर्ता पुरस्कार वितरण, शेयर सदस्यका छोराछोरीलाई एस,एल,सी, परीक्षामा उत्कृष्ट अंक ल्याउने एक छात्र र एक छात्रालाई पुरस्कार वितरण, साथै विभिन्न प्रतियोगितामा विजयी तथा उपविजयी हुने सदस्यहरूलाई पुरस्कार प्रदान गरीएको हो।