सुर्खेत — चैते दशैंको दिन घरमा खाना पकाउँदै गर्दा सुर्खेतको वीरेन्द्रनगर नगरपालिका–१० बुदबुदीमा एक घरमा अचानक गोली खसेको छ। शनिबार बिहान स्थानीय टिका रिजालको भान्सामा रहँदा गोलीले टिनको छाना छेडेर भित्र खसेको हो।

गोली कसले र किन चलायो भन्ने अहिलेसम्म खुल्न सकेको छैन। टिनको पाता छेड्दै खसेको उक्त गोलीले भान्सामा रहेको प्लास्टिकको बट्टा र फ्युज आल्मुनियमको बाटामा प्वाल पारेको रिजालले बताएका छन्। एक्कासी पड्किएको आवाज आयो, हामी डराएर बाहिर भाग्यौं, रिजालले भने।

घटना भएपछि प्रहरी अनुसन्धानमा खटिएको छ। जिल्ला प्रहरी कार्यालय सुर्खेतका प्रमुख प्रहरी उपरीक्षक रूपेश खड्काले भने, “गोली कहाँबाट र कसरी आयो भन्नेबारे अहिले खुल्न सकेको छैन, अनुसन्धान जारी छ।

प्रहरीका अनुसार भेटिएको गोली एसएमजी, थ्रि नट थ्रि राइफल वा एसएलआर जस्ता हतियारमा प्रयोग हुने खालको हो। गोलीको प्रकार र खसेको दिशा पहिचान गर्न प्रहरीले थप अनुसन्धान अघि बढाएको जनाएको छ।