विपुल र रविको जोडी पाँचौं इन्टरटेन्मेन्ट टेबलटेनिस च्याम्पियन
![](https://seto-panchi.com/wp-content/uploads/2024/07/2ec56909-3038-4221-9244-84175fa28951.jpeg)
काठमाडौं । रिभाइभ टेबलटेनिस क्लबका विपुल महर्जन र रवि धाक्वाको जोडी पाँचौं इन्टरटेन्मेन्ट टेबलटेनिस प्रतियोगितामा च्याम्पियन बनेका छन्।
महालक्ष्मीस्थानस्थित रिभाइभ लिजर पार्कमा भएको फाइनलमा विपुल र रविको जोडीले आफ्नै क्लबका कैलाश श्रेष्ठ र प्रवेश बस्नेतको जोडीलाई ९–११, ११–६, ११–६ र १४–१२ को सेटमा पराजित गरे। विजेताले ४० हजार तथा उपविजेताले ३० हजार नगद पुरस्कार प्राप्त गरे।
इन्टरटेन्मेन्ट टेबलटेनिस ग्रुपको आयोजनामा भएको प्रतियोगितामा गोड स्पिन टेबलटेनिस एकेडेमीका सुरज वज्राचार्य र सञ्जय शाक्य तथा स्ट्याग च्याम्पियन्स एकेडेमीका सुमन शाक्य र सुस्मिता खड्काको जोडी तेश्रो भए । तेश्रो हुने जोडीले समान १०–१० हजार नगद पुरस्कार पाए ।
सहभागिताका लागि सबैलाई खुला गरिएको प्रतियोगितामा १ मात्र डबल्स स्पर्धामा प्रतिस्पर्धा भएको थियो । डबल्समा पुरुष÷महिला, पुरुष÷पुरुष र महिला÷महिला खेलाडीको जोडी मिलेर खेल्न पाउने प्रावधान थियो । जम्मा १ सय २८ खेलाडी सहभागी थिए ।
उत्कृष्ट खेलाडीको उपाधि भने पुरुष÷महिलामा छुट्टाछुट्टै प्रदान गरिएको थियो । पुरुषमा रिभाइभका एलेक्स महर्जन तथा महिलामा राष्ट्रिय च्याम्पियन स्ट्याग च्याम्पियन्स एकेडेमीकी नविता श्रेष्ठ उत्कृष्ट खेलाडी घोषित भए । दुवैले जनही १० हजार नगद पुरस्कार जिते ।
विजेतालाई बागमती प्रदेशका सांसद् मिनकृष्ण महर्जन, साग स्वर्णधारी टेबलटेनिसका सिजरिन शाह र गीता शाह, ललितपुर जिल्ला टेबलटेनिस संघका अध्यक्ष आशिष अवाले, आयोजक ग्रुपका अध्यक्ष सुमन खड्गी, जिओम टेबलटेनिस नेपालका निर्देशक ज्याकी महर्जनलगायतले एक कार्यक्रमबीच पुरस्कृत गरे। समापनका अवसरमा जिओमले सहभागी १ सय २८ खेलाडी मध्ये ७ जनालाई ‘लक्की ड्र’ मार्फत ५० हजार रुपैयाँ बराबरको रबर र बल प्रदान गरेको थियो।
![](https://seto-panchi.com/wp-content/uploads/2024/07/1-8.jpeg)
![](https://seto-panchi.com/wp-content/uploads/2024/07/table-tennis-champion-1080x720.jpg)
प्रतिक्रिया दिनुहोस्