सुर्खेत । भारतीय क्रिकेट स्टार शिखर धवन नेपाल प्रिमियर लिग (एनपीएल) खेल्नका लागि शुक्रबार साँझ काठमाडौं आइपुगेका छन्। धवन यसपटक कर्णाली याक्स टिममा आबद्ध छन्।

त्रिभुवन अन्तर्राष्ट्रिय विमानस्थलमा धवनलाई कर्णाली याक्सका मालिक झनक दत्त खनाललगायत टोलीका सदस्यहरूले स्वागत गरेका थिए। धवनले सञ्चारकर्मीसँग संक्षिप्त संवाद गर्दै नेपालमा क्रिकेटको स्तर उकास्न विदेशी खेलाडीको उपस्थितिले महत्त्वपूर्ण भूमिका खेल्ने बताए।

“विदेशी खेलाडीले आफ्नो अनुभव यहाँ सेयर गर्दा नेपाली खेलाडीलाई अन्तर्राष्ट्रिय स्तरमा खेल्न सहयोग पुग्छ। यसले नेपाली क्रिकेटको विकासमा ठुलो योगदान दिनेछ,” उनले भने।

शिखर धवनले नेपाल र भारतबीचको ऐतिहासिक सम्बन्ध स्मरण गर्दै आफू पहिलोपटक नेपाल आएको बताउनुभयो। उनले नेपाल भ्रमणका क्रममा पशुपतिनाथ मन्दिरको दर्शन गर्ने र भ्याएसम्म हिमालयको दृश्यावलोकन गर्ने इच्छा व्यक्त गरे।

नेपाल प्रिमियर लिग शनिबारदेखि सुरु हुँदैछ, जसमा विभिन्न अन्तर्राष्ट्रिय खेलाडीले सहभागिता जनाउँदै छन्। एनपीएल लाई नेपाली क्रिकेटको प्रवर्द्धनका लागि महत्वपूर्ण मानिएको छ।