सल्यानमा सोमबार भएको एक मिनी ट्रक दुर्घटनामा परी चार जनाको मृत्यु भएको छ। दुर्घटनामा २४ वर्षीय चालक मानबहादुर भण्डारीको मृत्यु भएसँगै मृतकको संख्या चार पुगेको हो।

दुर्घटनास्थलमा १४ वर्षीय गोवर्द्धन खड्का, १२ वर्षीय डिल्ली भण्डारी र १३ वर्षीय सृजना बस्नेतको मृत्यु भएको थियो। चालक भण्डारीको उपचारका क्रममा दाङको तुल्सीपुर राप्ती अस्पतालमा राति निधन भएको जिल्ला प्रहरी कार्यालय सल्यानका प्रवक्ता रेशम बहादुर खत्रीले जानकारी दिएका छन्।

मिनी ट्रक (रा१ख २४०२) कपुरकोट गाउँपालिका–६, सिनबाङको दुबेदेबाट धान र पराल बोकेर छाप्नेटातर्फ जाँदै गर्दा सडकबाट १५० मिटर तल खसेको थियो। दुर्घटनामा घाइते भएका अन्य ७ जनाको विभिन्न अस्पतालमा उपचार भइरहेको छ।