सुर्खेत – दार्चुलामा शुक्रबार विहान जिप दुर्घटना हुँदा ६ जनाकाे मृत्यु भएको छ भने ७ जना घाइते भएका छन्। शैल्यशिखर नगरपालिका–६, बकजेबलामा म १ ज ३३८ नम्बरकाे जिप दुर्घटनामा परेको हो।

सुदूरपश्चिम प्रदेश ट्राफिक प्रहरी कार्यालय, अत्तरियाका प्रमुख प्रहरी उपरीक्षक (एसपी) राजिव बस्नेतले दुर्घटनामा ६ जनाको मृत्यु भएको सेतोपंक्षीलाई जानकारी दिनुभयो। मृतककाे पहिचान खुल्न भने बाँकी रहेको छ।

दुर्घटनामा अन्य ७ जना घाइते भएका छन्, जसलाई नजिककाे स्वास्थ्य केन्द्रमा उपचारका लागि पठाइएको छ। जिपमा अझै पनि केही यात्रु सवार रहेको हुनसक्ने आशंकामा खोजी कार्य जारी राखिएको छ।

प्रहरीका अनुसार उक्त जिप मालिकार्जुनबाट गाेकुलेश्वरतर्फ जाँदै थियो र बिहान करिब ४ बजेतिर दुर्घटनामा परेको हो। स्थानीय मालिकार्जुन मन्दिरमा जात्रा हेर्न गएका दर्शनार्थीहरू लिएर फर्कने क्रममा जिप करिब १०० मिटर तल खसेको बताइएको छ। दुर्घटनाकाे कारण अझै खुल्न सकेको छैन भने घटनास्थलमा थप अनुसन्धान भइरहेको प्रहरीको भनाइ छ।